Nyhetssaker
4,8 millionar til forsking på medium og dataspel
Medietilsynet har fordelt nær 4,8 millionar kroner til forsking på medium og dataspel. 14 prosjekt får støtte.
Fleire av prosjekta tar utgangspunkt i utfordringar med dagens mediebruk, særleg blant unge vaksne. Åtte forskingsprosjekt og seks masteroppgåver får støtte. Fire av forskingsprosjekta omhandlar kritisk medieforståing, mens tre er relaterte til mediemangfald. Tildelinga til eitt av forskingsprosjekta blir gjennomført som oppfølging av regjeringa sin handlingsplan mot speleproblem.
Medietilsynet fekk inn totalt 53 søknader.
Algoritmar og nyheitsbruk blant unge vaksne
Steen Steensen ved Høyskolen Kristiania får støtte til prosjektet “Algoritmiske redaktører og mediemangfold”. Prosjektet skal undersøke om modereringsalgoritmane til plattformselskapa avgrensar mangfaldet av nyheiter som nordmenn blir eksponerte for i sosiale medium.
Anna Grøndahl Larsen får støtte til prosjektet “Nyhetsbruk og kritisk forståelse blant unge voksne”. Prosjektet skal gi meir djupnekunnskap om korleis unge vaksne får, bruker og vurderer nyheiter. Korleis tenester som ChatGPT og Snapchats My AI inngår som ein del av informasjons- og nyheitsprakisen til unge, og korleis informasjonen herifrå blir forstått, vurdert og brukt, inngår også i prosjektet.
Vidare får Mehri S. Agai ved Universitet i Bergen støtte til å analysere korleis sosiale forskjellar formar korleis ungdom regulerer skjermtid og digitale medium i kvardagen sin.
Dataspel og speleproblem
Regjeringa har øyremerkt 400 000 kroner til forsking på dataspel i handlingsplanen mot speleproblem. Beate Wold Hygen ved NTNU Samfunnsforsking får støtte til prosjektet “Gaming som verktøy i arbeid med sårbare barn og unge”. Prosjektet skal blant anna skaffe oversikt over eksisterande forsking der dataspel er brukt i arbeid med barn og unge som strevar. Det blir også gjennomført ei kvalitativ undersøking knytt til tilbod der dataspel er nytta for å hjelpa utsette barn og unge som slit fysisk, psykisk eller sosialt.
Til hausten blir det opna for nye søknader til forsking på dataspel-problematikk, og då aukar potten til 750.000 kroner.
– Vi håper denne auken motivere til fleire eller større prosjekt, og dermed meir viktig arbeid mot speleproblem, seier avdelingsdirektør Hanne Sekkelsten i Medietilsynet.
Disse får støtte
| Søker | Tittel på prosjekt | Innvilget beløp |
| NORDISKE MEDIEDAGER - Silje Hammersland | Medieundersøkelsen 2024 | 350 000 |
| HØYSKOLEN KRISTIANIA - Steen Steensen | Algoritmiske redaktører og mediemangfold | 808 487 |
| HØGSKULEN I VOLDA - Kate Kartveit | Norsk medieforskerkonferanse 2024 | 80 000 |
| SAMFUNNS- OG NÆRINGSLIVSFORSKNING AS - Tellef Raabe | Subsidiert tilgang til journalistikk: Et mediepolitisk virkemiddel for å nå ungdom? | 667 000 |
| SINTEF - Anna Grøndahl Larsen | Nyhetsbruk og kritisk forståelse blant unge voksne | 807 500 |
| MASTERGRADSSTUDENT - Ine Røvik | Generativ AI i journalistikken – En studie av maskindrevet nyhetsjournalistikk og redaksjonelle vurderinger | 40 000 |
| MASTERGRADSSTUDENT - Elise Marstein | Skjerm i den digitale tidsalderen: En diskursanalyse av debatten om skjermbruk i skolen | 40 000 |
| MASTERGRADSSTUDENT - Magnus Wethal | Den fjerde statsmakts strategiske respons på endringer i statens pressestøtte. | 40 000 |
| OSLOMET - Vilde Schanke Sundet | Grønne medievalg: Utfordringer for mediepolitikk, bransje og brukere i møte med klimaendringer og bærekraftsmål | 682 000 |
| MASTERGRADSSTUDENT - Endre Vassenden | Nasjonalisme i norsk og svensk presses dekning av vinter-OL i Beijing i 2022. | 40 000 |
| NTNU SAMFUNNSFORSKNING AS - Beate Wold Hygen | GAMING SOM VERKTØY I ARBEID MED SÅRBARE BARN OG UNGE | 400 000 |
| MASTERGRADSSTUDENT - Birthe Bringsvor | Språkskifte blant nettjournalistar i NRK | 40 000 |
| MASTERGRADSSTUDENT - Kristine Widlund Klipper | Fullstendig frakoblet? - Mediebruk og offentlig tilknytning blant irregulære migranter | 40 000 |
| UNIVERSITETET I BERGEN - Mehri S. Agai | Ungdommens digitale balansekunst | 803 243 |
| Sum | 4 838 230 |
